لسه راجعه من مصر امبارح هحكيلكم الرعب اللي شوفته من البلطجية

بسم الله الرحمن الرحيم
اذيكم كلكم يا رب تكونوا بخير
انا طالبة جامعية مصرية بس اهلي مقيمين في الخليج ومتعودة كل سنة باجيلهم في اجازة نص السنة اقضيها معاهم المهم اني كنت حاجزة من شهرين علي اني اسافر يوم الاربع اللي فات ولكن حصلت ظروف واجلت سفري ليوم الحد اللي هو اول امبارح وطبعا لو كنت سافرت الاربع كان زماني نجيت من اللي شوفته اليومين اللي عشتهم في رعب في مصر ولكن النصيب بقي اقسم بالله ما اقدر اوصفلكم اللي حصلي ولا الرعب اللي عاشه كل المصريين عمري في حياتي ما هنسي اللي حصل ولا هنسي شكل مصر اول امبارح وانا رايحة المطار وشكل اقسام الشرطة المحروقة ولا نقاط المرور المتدمرة تخيلوا ولا شرطي واحد ولا عسكري حتي في شارع واحد تحس انها بلد مهجورة وفاضية ده طبعا غير الرعب اللي قضيناه يوم السبت بالليل لقيت بنت عمتي اللي في بلد قريبة مني بتتصل بيا الساعه 12 بالليل وتقولي اقفلوا علي نفسكوا كويس لحسن البلطجية جايين علينا وكل الرجاله طلعوا بره بعصيان وسكاكين عشان لو جم يمنعوهم يدخلوا البيوت وطبعا انا قاعده في البيت انا اوختي وجدتي وبنت خالتي يعني ستات وبس مفيش راجل ممكن يحمينا تخيلوا بقي احساسكم والموت بيقرب منكم والبلطجية جايين يكسروا الباب عليكم ويدبحوكم زي ما بنسمع الناس بيقولوا في كل مكان دول دخلوا علينا وعملوا وسووا طبعا انا مبقاش فيا نقطة دم قسما بالله حسيت ان الموت جاي حالا وبعدين لقيت بنت خالتي بتتصل برده من بلد جمبنا من الناحية التانيه بتقول الحقوا البلطجية جايين علينا وهيجوا عليكم والرجالة برده عندهم خرجوا يقابلوهم طبعا تخيلوا احساسي والبلطجية جايين عليا من الناحيتين وطبعا جدتي ست كبيرة كانت هتموت من الخضة وانا واختي وبنتخالتي حالنا ما يعلم بيه الا ربنا قعدنا نقرا قرآن وحطينا كل الصالون والانتريه ورا الباب مع اننا عارفين انه مش هيعمل حاجه بس اهو اي حاجه وخلاص وقعدنا ندعي ربنا وانا والله ما كنت قادرة اقف علي رجلي من الرعب اللي كنت حساه شوفت ليلة عمري في حياتي ما هنساها وبعدها بشوية قالوا السجن للي عندنا اتحرق والناس خرجت منه وبيجروا في الشوارع وفي ضرب نار وبلاوي المهم في اليلة دي بس حسيت بمعاناة الفلسطنين في الليلة دي بس عرفت يعني ايه خوف ويعني ايه رعب ويعني ايه وطن بيتخرب بس المراار عندي كان اكتر شوية لان في فلسطين اللي كانوا بيعملوا كده يهود لكن في مصر مصريين مسلمين يعني اخواتي وبتسليط من انسان المفروض انه الحاكم بتاعنا المفروض انه هو مصدر الامان لينا (مبارك) خطة قذرة طبعا لرعب الناس عشان يلهوهم عن المظاهرات ويخلوا كل واحد يجري يحمي بيته من البلطجية وكمان يشوهوا صورة الشباب بتوع الثورة ويقولوا انهم بلطجية ورعاع لا عندهم قضية ولا حاجه والحمد لله ربنا ستر يومها والبلطجية موصلوش عندنا ربنا بس هو اللي كان قادر يحمينا وفعلا احتمينا بيه وحمانا ودي كانت اخر ليلة ليا في مصر وبعدها تاني يوم كان معاد طيارتي طبعا روحت المطار وانا كلي ترقب وخوف لانهم كانوا بيقولوا ان البلطجية بيقطعوا الطرق بس الحمد لله ربنا ستر كل اللي جرحني وحسرني مناظر اقسام الشرطة المحروقة ونقاط المرور المولعه المكسورة ولا ظابط ولا عسكري في اي مكان غير في المطار فيه ظباط لسه وفي عساكر كان هو وقتها المكان الوحيد اللي فيه ظباط لسه في مصر وطبعا شوفت الويل والمر علي ما قدرت اوصل لطيارتي زحمةةةةةةةةةةةةةةةةةةةةة رهيبببببببببببببة مفيش مكان تمشي فيه الناس هناك من كل الجنسيات الوووووووووفات اللي نايم واللي قاعد واللي واللي وعلي ما وصلت لمكان مكتب الطيران اللي انا تبعه كان فاضل ساعه علي طيارتي وكنت بجري جري والله اعصابي باظت مش لاحقة اعمل حاجه ولا عارفه اتحرك انا واختي وفاضل علي الطيارة وقت بسيط بس ربنا سهلها في الاخر والطيارة اتأخرت واستنتنا الحمد لله وهي دي كانت اصعب يومين في حياتي علي الاطلاق عمري ما هنساهم
والحمد لله اني عرفت اوصل لاهلي هنا وان شاء الله برده هرجع مصر قريب لاني حاسه بنار جوايا اني بعيد عنها في وقت زي ده ووحشتني اوي ربنا يحميكي يا بلدي وينتقم من كل خاين وعميل وينتقم منك يا مبارك بحق الرعب اللي ورتهولنا ووريته للاطفال والشيوخ والله ربنا ما هيسيبك واللي خرب مصر وطلع البطجية انت اللي سرق ونهب وسلطهم انت وان شاء الله في نار جهنم وبئس المصير
معلش لو طولت عليكوا بس حبيت انقلكم جزء من معاناتي ومعاناة المصريين اللي هناك ادعولهم