شعرك دهني وبيتساقط بقوة؟؟ وعشان شعرك مكانه راسك تعالي وانا عندي الحل

انا بصراحة بعاني من الشعر الدهني ... وبالرغم من ان الشعر الدهني صحي وبيعالج نفسه بنفسه ومش محتاج اي تعب عشان اللمعان وانه يكون بمضهر صحي عشان هو كدهني بيغذي نفسه بنفسه... لكن الشعر الدهني وما ادراكم ايه الشعر الدهني اكيد ليه سلبيات اولها اني مش بلحق اتهنى بشعري لو عملته سشوار او فرد او اي حاجة ما بلحقش يادوب ابقى غاسلاه اول النهار اخر النهار بيبقى شكله بيلمع لمعه رخمة كده وبيبتدي يهرش يعني بيضوي الضو الاحمر انه عايز غسيل شوفتوا وكسه زي دي يلا ما علينا والاهم من السيئة دي انه مش بيتجاوب مع الزيوت الطبيعيه لانه دهني بطبعه فالزيوت بتزيده دهون وبيبقة مزيت بعد ما احممه بساعه مثلا لو استعملت زيوت عاديه عليه ... وعشان عمري ابتدى يكبر يعني شعري ما بقاش صحي لوحده وابتديت اشوفه بينزل كله بالتدريج وبدون اسباب طبعا راجعت طبيب متخصص بتساقط الشعر وما خدتش منه غير وعود كدابه ومصاريف مهوله على ادوية ورشاشات للشعر ووصفات وشامبوهات ما جابتش نتيجة يعني مجرد ما وقفتها رجع شعري يتساقط بطريقة اغبى من الاول...

معلش المقدمة طويلة بس انا حبيت اقولكم بجد قد ايه مشكلتي كبيرة وعشان انا عيلتي البنات فيها شعرهم بيبقى خفيف جدا لما بيكبروا ابتداءا من مامتي الله يرحمها وانتهاءا بخالاتي واختي الكبيرة كلهم بقت فروة راسهم باينة من خفة شعرهم.... انا طبعا مش من النوع ده وكل ما بشوف شعري بيوقع بقيت اتفزع .... لانه تقريبا مع كل حمام بيوقع بطريقة مخيفة ولاني بتحمم اكتر من اربع مرات بالاسبوع يعني تقدروا تقولوا لو فضلت سنة على كده ممكن الاقي نفسي اتقرعت ببساطة.....

المهم بقى انا جبت الوصفة دي وبصراحة لأول مرة في حياتي من يوم ما ابتدى شعري يوقع وابتديت اعالجة الاقي حاجة بتدي نتيجة من اول مرة ومن اول استعمال بجد بجد بجد حاجة رهيبة ... ولو اي حد فيكم شعرها دهني تعملها بجد بجد وهتدعيلي لانها عملت معايا نتجية سحرية والحمدلله ابتديت اغسل شعري وما اشوفش اي شعره بتوقع منه لا وانا بغسله ولا وانا بمشطه ولا انا بسرحه ... والاهم بقى والمفاجاة التقصف اختفى نهائي وبقى شعري صحي من جذوره لاطرافه زي الاول واكتر ...اللمعان بقى مش هاقول عليه جربوه وانتوا هتشوفوا بنفسكم ...بجد وصفة رهيبة

اقولكم المقادير
معلقتين ك- عسل
معلقتين ص- بن (قهوة)
معلقتين ك- عصير زنجبيل(تجيبي الزنجبيل الطازج وتقطعيه قطع صغيره وتعصريه وتصفيه)
ملعقة عصير ليمون
موزتين ناضجات( يعني ما تاخديش الموز الطازج لا استنيه شوية لمايسود ويتهري شوية)
زيت لوز ملعقتين -ك
ملعقتين كبار زيت زيتون او اي زيت متوافر عندك ومفيد لشعرك

تاخدي المقادير وتضربيها بالخلاط لغاية ما يتكون عندك معجون متل كريم الشعر لو فضل رخو شوية زيديه موز المهم النتيجة تكون معاكي حاجة متماسكة وقوامها كالكريم .... تضعيها على شعرك من الجذور حتى الاطراف ... وتتركيها على شعرك اقل شي 2 ساعه وكل ما تركتيها اكتر كل ما كانت النتيجة افضل ... المهم مو اقل من ساعتين

اه نسيت اقولكم ان القهوة اللي في الوصفة دي بتدي للشعر لون رهييييييييييييب احلى الصبغات مش بتعمله وحاجة اجمل كمان حسيت ان كل مرة بعملها الشعر الابيض عندي بيخف طلوعه وبيبقى مش باين بين شعري اصل بتغمقة القهوة ومش بيبقة ابيض واضح بشعري......هو صحيح مش ابيض كتير بشعري لكن الكام شعره مزعجيني بجد وكنت اصبغ شعري مرتين وتلاتة احيانا بنفس الشهر عشان مش يبانوا دلوقتي بقالي اكتر من شهرين مش صبغت شعري بجد والله بدون مبالغه وابدا مش باين اي لون بشعري غير لون روووووعه ولمعان جميل وتقصف بح ما فيش ودعته من اول مرة استعملت الخلطة دي
ماشي الوصفة دي نعملها مرتين بالاسبوع .....

لو حبيبتي بقى تخلي شعر جديد يطلع في اماكن تحسي انها خفيفة استعملي وصفتي التانية اللي خلت شعري اللي وقع ابتدا ينبت مكانه شعر جديد اكتر من شعري الطويل بجد نتيجة روووعه... جيبي زيت خروع ومقابل كل معلقة كبيرة من زيت الخروع اهرسي زر تومة... يعني لو وضعتي 4 ملاعق كبيرة زيت خروع يكون مقابلها 4 ازرارتوم مهروس وتضعي التوم بالزيت لمده 36 ساعه وبعدها تصفي الزيت وبتضعيه على شعرك لمده 1 او 2 ساعه وما تخافيش من الريحة خالص لاني استعملتها كتير جدا ومن تاني مرة بنفس الحمام استعمل الشامبو على شعري الريحة بتروح خالص المهم يكون الشامبو بتاعك ريحته حلوة انا بستعمل TREseme ده شامبو توووووووحفة وريحته خيالية وانا بصراحة بهتم جدا بالشامبو انه لازم تكون ريحته حلوة عشان شعري من الزيوت اللي فيه اول ما يبتدي يزيت بيطلع ريحة وحشة لو مش كان الشامبو ريحته قوية..... المهم بقى ما تخافوش من ريحة التوم لانها بتروح خالص ومش بتفضل بالشعر من تاني تالت مرة تغلسية بيها بنفس الحمام ....

بتمنى اكون افدتكم بتجربتي لان بجد بجد تعبت من تساقط شعري والحمدلله الوصفتين دول مش بس منعوا التساقط لا كمان ابتدا شعر جديد يطلع والحمدلله اتخلصت من مشكلة التساقط نهائيا ....

الي تعمل الوصفة دي وتديها النتيجة اللي مستنياها
تدعي لوالدتي بالرحمة والمغفرة ...
وتدعيلي يرزقني حب ربنا ليا ورحمته وعفوه ورضاه
الله الله باردود والتفاعل يا حلوين لان تقريبا بصمات ايدي اتمحت وانا بكتب ليكم....
شجعوني اكتر وهاديلكم نصايح اكتر بخصوص الشعر والعناية بالبشرة لان الحمدلله بقيت خبرة على ما اتضبط وضعي

يلا سلام بقى بلاش حد يزئني من شباك المنتدى كتر ما صدعتكم ويخلص مني ههههههههههه
سلام يا حلوين ولا تنسووا التفاعل